راندا ابو النجا تكتب : الغلابة هما اللي دفعوا
في مصر لما عملنا ثورة الغلابة هما اللي دفعوا التمن لما حكمنا الإرهابيين الغلابة هما اللي دفعوا التمن الإرهاب بيستهدف الغلابة الغلاء ييستهدف الغلابة العجز بيستهدف الغلابة المياه المسممة بتستهدف الغلابة نقص الغاز بيستهدف الغلابة تشريد العمال بيستهدف الغلابة الفساد بيستهدف الغلابة التعذيب في الأقسام والموت والسب بالأب والأم بيستهدف الغلابة الإعلام العقيم بيستهدف عقول الغلابة التعليم السيئ بيستهدف الغلابة التلوث بيستهدف الغلابة المستشفيات الحكومية ما هي إلا مشرحة للغلابة طوابير العيش للغلابة رحلة البحث عن أنبوبة غاز باسعار مضاعفة من نصيب الغلابة عمرك شفت غني بيشتكي من زحمة الطوابير ولا من سوء المعاملة في اقسام الشرطة ولا من المياة المسممة ولا ومن إلغاء الدعم ولا مش لاقي سرير في مستشفى حكومي ولا معندوش مولد كهربي لما الكهربا تقطع ولا انفجرت فيه قنبلة وهو بيقلب في صناديق الزبالة ولا واقف متضامن مع العمال الغلابة اللي اتشردوا ولا بيشتكي من سواقين الميكروباصات اللي رفعوا تعريفة الأجرة من الآخر الغلابة هما اللي بيحاسبوا علي المشاريب اللي مشربوهاش الغلابة هما اللي انتخبوك يا ريس مش اصحاب الجيوب المنتفخة اللي هما بيحاربوك دلوقتي من تحت الترابيزة احنا عايزين وطن للغلابة يا ريس عايزين كرامة للغلابة يا ريس يا سيادة الرئيس السيسي الغلابة دول رأس مالك وسندك أنت من غيرهم ولا حاجة دول لا عملاء ولا تبع الأمريكان ولا ممولين ورغم المر اللي شايفينه محدش منهم شتم في البلد وإن شتموا فيها ده من كتر حبهم فيها ومع ذلك ياكلوا باسنانهم اللي يغلط في بلدهم رغم الذل اللي شايفينه ارتقي بالغلابة حتى يرتقي وطنك يا ريس إرضاء الغلابة وإعلاء شانهم هو الحل يا ريس اعذرني عشان المقال بالعامية اصل أنا بكتب بلسان الغلابة يا ريس.